По пеколниот бран што ја зафати Европа, сега централниот дел на континентот беше погоден од силно невреме – има и жртви. Во Австрија животот го загуби 26-годишен возач на мотор, врз него паднала гранка, во Романија, пак, маж бил пронајден мртов во автомобил врз кој паднало дрво.
Невремето, проследено со поројни дождови, град, силен ветер и поплави, предизвика големи проблеми во Словенија, Австрија и јужните делови на Германија. Во Словенија е прогласено портокалово предупредување за целата земја, а метеоролозите најавуваат нови силни бури со обилни врнежи, грмежи и силен ветер.
Во Австрија за делови од земјата е издадено највисоко ниво на предупредување поради опасност од интензивни врнежи, град и силни ветрови. Во германската покраина Баварија, обилните дождови предизвикаа поплави, стотици интервенции, паднати дрвја и прекини во авионскиот и железничкиот сообраќај.
Над Боденското Езеро беше забележана и водена пијавица – слична на торнадо, но се развива над вода. Метеоролошките служби предупредуваат дека и во наредните денови во делови од Централна Европа се можни нови локални невремиња со силен дожд, град и ветер.
