Најавата за ново линеарно, наместо процентуално зголемување на пензиите ги охрабри пензионерите. Иницијативните одбори кои во изминатиот период протестирајќи по улиците бараа зголемување, сега упатија јавна благодарност до Владата. Велат, сумата од 2000денари воопшто не е за потценување и со ова граѓаните, од третата доба конечно ќе можат да живеат достоинствено.
„Ако гледате математички, може слободно да кажам…претходни ни дадоа 5000денари и сега уште 2000. Кога сетоа тоа ќе го ставите во еден простор од година и нешто ….јас имам над 70години и не сум видел некоја Влада за година дена да качи 6.000денари. Пензионерите нека го сватат ова, бидејќи сумата не е за потценување„ изјави Трајче, претставник на Собрание на иницијативни одбори.
Пензионерите порачаа дека Владата, треба да размислува и во насока да им се обезбедат и други бенефиции, како на пример дисконт картички со кои и најсиромашните пензионери ќе можат да си купат леб и лекови.
„Едноставно борбата е за пензионерите со мали примања да осетат малку благодет. Ние знаеме дека сме сиромашна држава, но достоинствено и оние најсиромашните пензионери да можат корка леб да јадат „истакна член на Иницијативниот одбор.
Иницијативните одбори на пензионери и понатаму останува на ставот дека под итно треба да се смени актуеалната претседателка на Сојузот на пензионери, која наместо линеарно бараше процентуално зголемување, со кое како што велат, бенефит ќе имале само пензионерите со високи пензии.
