Од еколошка бомба до зелена оаза, старото јаловиште од рудникот „Злетово”, кое со децении се смета за еколошка закана за Пробиштип и околината, конечно ќе добие трајно решение. Општината подготви проект за санација на старата хидројаловишна депонија, во која со години се таложел отпад од преработката на оловно-цинковата руда. Со реализација на проектот трајно ќе се затвори едно од најсериозните еколошки прашања во регионот.
„За почеток ќе започнеме со одводнување на старото јаловиште, понатаму ќе продолжиме со дел насипување, дел со поставување на геосинтетска глина или мембрана која нема да дозволи водата повторно да влегува во него и ќе продолжиме со рекултувација, односно посипување на хумус на косините и на рамниот дел на јаловиштето„ изјави градоначалникот на Пробиштип, Тони Тоневски.
Во минатото, имаше иницијатива на просторот да се постават фотоволтаични панели, но сегашната локалната власт размислува за поинаква иднина на оваа локација. По санација и рекултивација јаловиштето би можело да прерасне во зелена оаза со паркови, детски игралишта, спортски терени или пак комерцијална зона. Сепак, конечната одлука ќе ја дадат граѓаните на Пробиштип. Од наредната недела ќе започне анкета преку која жителите ќе можат да го кажат своето мислење за идната намена на просторот.
„Имаше еден проект, односно иницијатива за измена на планската документација, за поставување на фотоволтаици. Јас како градоначалник лично не се согласувам со тоа, бидејќи се работи за непосредна близина на градско подрачје. Меѓутоа за тоа ќе ги прашаме граѓаните„ изјави градоначалникот на Пробиштип, Тони Тоневски.
Јаловиштето на рудникот „Злетово”е формирано во 1937година и денес зафаќа површина од околу 50хектари. Во него, како резултат на повеќедецинска преработка на рудата, се депонирани повеќе од 10милиони кубни метри отпад. Анализите покажале дека отпадот содржи олово, цинк, кадмиум и други тешки метали, кои преставуваат потенцијален ризик за здравјето на луѓето и животната средина.
Александра Ристевска
