Од луксузни јахти и летувалишта се блокира процесот за донесување на новиот Изборен законик. Од ЗНАМ обвинуваат дека партиите кои претходно се залагаа за изборни реформи, сега го блокираат усвојувањето на законот, иако рокот за негово донесување е до 15 јули.
„Изненаден сум што оние кои многу често се повикуваа на потребата од измена на самиот законик, денеска многу повеќе ги гледаме по најлуксузните летувалишта во регионот, каде што испраќаат од јахти и други луксузни локации политички пораки дека не се согласуваат со истиот и го блокираат самиот процес“, изјави претседателот на ЗНАМ, Максим Димитриевски.
Димитриевски смета дека мора да се изнајде соодветна форма како нашите во дијаспората ќе учествуваат на избори. Тој посочи дека тие би го поддржале предлогот за една изборна единица, но доколку е прифатлив и за останатите политички субјекти.
„Само треба да се изнајде формата и начинот како тие да го остварат тоа право. Зборувам за учество на парламентарни и претседателски избори. Додека во делот за гласањето на локални избори, тие се резиденти на други општини, во други држави. Во дел од нив и имаат право да гласаат, така што не даваме согласност за таква мерка“, изјави претседателот на ЗНАМ, Максим Димитриевски.
Димитриевски посочи дека со преземањето на ресорот земјоделство, приоритет на ЗНАМ во наредниот период ќе биде подобрување на условите за земјоделците.