Пожарите, поттикнати од топлотниот бран и силните ветрови, се шират низ Јужна Европа и принудуваат многу луѓе да ги напуштат своите домови. Нови пожари избувнаа во Франција, Шпанија, Грција и Турција, а илјадници луѓе беа дополнително евакуирани. Сепак, во Франција и Шпанија, каде што пожарите беа ставени под контрола, евакуираните жители можеа да се вратат во своите домови.
Во Грција во моментов беснеат неколку шумски пожари, од кои најжестоките се на југот од островот Крит. За време на гаснењето загинаа двајца пожарникари, кои во своето возило ја загубиле ориентацијата во густиот чад. Ветерот дувал толку силно што хеликоптерите и противпожарните авиони морале да ги прекинат операциите и да слетаат.
Уште еден пожарникар беше пронајден мртов во близина на пристаништето Гитео на полуостровот Пелопонез. Точната причина за смртта засега не е соопштена.
Во Анталија, на југот на Турција, пожарникарите од вторникот се борат со неколку пожари во туристичкиот регион, од кои повеќето веќе се изгаснати, објави државната новинска агенција „Анадолу“.
