Европа се затоплува двојно побрзо од светскиот просек, а околу 150 милиони луѓе се изложени на опасно високи температури. Светската здравствена организација предупреди дека од 21 јуни досега во Европа се регистрирани над 1.300 смртни случаи поврзани со екстремните горештини. СЗО повика земјитe итно да воведат мерки за заштита од топлотните бранови.
„Екстремната топлина е една од најсериозните и брзорастечки закани за здравјето и безбедноста што ги претставуваат климатските промени и можат да станат голема опасност по здравјето на луѓето што присуствуваат на масовни собири и спортски настани“, изјави генералниот директор на СЗО Тедрос Аданом Гебрејесус, на твитер.
Досега највисоката измерена температура е во Германија, на некои места беа измерени 41.7 степени. Во слични услови живеат и жителите на Франција – Париз врие на 40 степени. Швајцарија го искуси најтоплиот јунски ден во својата историја, во саботата во Базел беа измерени 39 степени. Во Германија и во Чешка над 41 степени, а Полска го надмина националниот температурен рекорд. Според експертите, еден од главните причинители за горештините е таканаречена „топлинска купола“.
„Се работи за генерирање на таа топлина локално внатре во Европа поради чистото небо, силната сончева светлина и таа компресијата на воздухот кој се спушта во системот на висок притисок што предизвикува да се кренат температурите“, изјави Лиз Бентли, главен извршен директор на Кралското метеоролошко друштво.
„Многу е жешко во мојот апартман, живееме на најгорниот кат. Сакаме да учиме сакаме да продолжиме со животот нормално но скоро невозможно е.“
„Ова е повеќе како топлината што ја добиваме во централна Австралија. Значи целосно е обратно од тоа што очекував, кога се работи за температура, во Варшава.“
„Живеам во многу стара станбена зграда од 1700-тите години и станува многу жешко и нема како да се олади.“
Причина за смрт не е само топлотниот шок. Во Франција до сега се удавиле 74 луѓе панично скокајќи да се оладат. Европските земји не се целосно спремни за вакви феномени бидејќи во Европа само 20% од популацијата поседува клима. Во 2022 поради слични климатски услови починаа 20.000 луѓе. Иако најизложена е западна Европа, се очекува бранот да има ефект и врз југоисточна Европа. На Балканот односно во Хрватска, властите најавија црвено предупредување, а српските метеоролошки станици исто така очекуваат прекумерно зголемување на температурите.
