Комората за интегрирано приватно здравство (КИПЗ) стана дел од Сојузот на стопански комори. Со тоа, оценуваат од КИПЗ, приватното здравство добива свој организиран, легитимен и кредибилен глас во рамки на бизнис заедницата во Македонија.
– Денес, ја отвораме првата страница од институционалниот живот на Комората за Интегрирано Приватно Здравство. Пред нас е обврската да ја оправдаме довербата што ни е укажана и да покажеме дека приватното здравство знае да се организира, да предлага решенија и да биде конструктивен партнер во креирањето на здравствените политики. Верувам, дека ова е почеток на една успешна приказна која заеднички ќе ја градиме, вели Татјана Велиновска – Димовска, иницијатор на идејата.
Изразувајќи благодарност до раководството на ССК за укажаната доверба, Велиновска – Димовска нагласува дека влезот во ССК не значи само институционално членство, туку признание за значењето на приватното здравство како значаен економски сектор и партнер во развојот на државата.
