Македонските млади имаат и волја, а и знаење за да почнат да ги предводат светски трендовските „зелени“ промени, односно да бидат активни креатори на „зеленото претприемништво“. Она што им треба е само поголем поттик и поддршка од образовните институции, заедницата и државата. Ова беше истакнато на Конференцијата за „Претприемништво и вработливост на младите преку обука за зелени и претприемачки вештини, менторство и промоција на зеленото претпримеништво“, која се одржа во Прилеп.
„Знаеме дека многу млади се имаат иселено, а од оние кои што се останати, ретко кој сака да се занимава со земјоделие…Кај нас треба да се направат регулативи кои ќе им помогнат на младите и ќе ги поттикнат, меѓутоа не само финансиски, туку и едукативно за да се сфати важната улога на земјоделството, бидејќи без земјоделство нема храна, а без храна не може да се опстои и не може една држава да биде независна ако не произведува храна“ – рече Филип Димкоски, дипл. агроном и претприемач.
„Изминативе две години работевме на креирање иновативна платформа за да може младите да пристапат до знаења, а воедно и до менторска поддршка за да започнат свои зеленички претприемачки потфати…Ова ќе значи младите да добиваат и менторски советодавна поддршка, а воедно да ги поврзуваме и со бизнис-заедницата, и со можностите за грантирање за да ги отпочнат своите зелени бизниси“, – посочи Марина Тошеска од ЛАГ „Агро-лидер“.
„Алатките ни помогнаа полесно да ги доближиме зелените вештини, зеленото претприемништво и да влијаеме како клучен фактор во подигнувањето на свеста кај учениците за потребата од промена…се’ со цел – заштита на животната средина и биодиверзитетот“ – истакна Ѓорѓија Гагалески, проф.во СОУ „Орде Чопела“, Прилеп.
„Најпрвин е потребна помош од Владата, бидејќи ние како невладина организација ќе ги обучиме, ќе ги тренираме, меѓутоа сепак треба дополнителна поддршка Владата за да може да се оставри нешто и во општините“, – кажа Миугел Ангел Викарио од Шпанија.
Конференцијата е дел од Проектот „Green up yourself“, а поддржан од Програмата „Еразмус+“. На неа учествуваа млади претприемачи од Шпанија, Италија, Кипар, Грција, Словенија и Македонија.
