На ДУИ и СДСМ очигледно приоритет им било пумпање на тендерите, а не капитални инвестиции и изградба на инфраструктура – велат од пратеничката група на ВМРО-ДПМНЕ, кои бараат расчистување на случајот. Според ревизорскиот извештај, за кој веќе е оформен предмет во јавното обвинителство, само автопатот Кичево – Охрид, иако веќе проектиран за тоа, колку ќе чини, станал поскап за повеќе од 200 милиони евра.
- „Автопатот Кичево – Охрид, што ВМРО-ДПМНЕ го остави во напредна фаза на реализација, едвај е поместен од ситуацијата во која е затекнат. А според ревизорскиот извештај е утврдено зголемување од цели 178 милиони евра за истиот. Тоа се пари додадени како анекси на договорите, на веќе испроектирани финансии, а патотот се уште за жал не е завршен. Лудоста на власта не застанала тука. Таа продолжила и со автопатот Скопје-Блаце, кој за 10 километри треба да чини 180 милиони евра, што е за 80 милиони евра повеќе од првично предвиденото.“ – Изјави пратеникот на ВМРО-ДПМНЕ, Игор Здравковски.
Државниот ревизор утврдил дека За дел од од овие зголемени трошоци, јавното пратпријатие нема дадено ниту објаснување, на што се должат. Меѓу инфраструктурните прокети кои станале еден вид црна дупка за народните пари, е и железничката пруга кон соседна Бугарија. Од владеачката партија велат дека тука се случила најголемата трагедија и грабеж на народот.
- „За третата делница од Крива Паланка до граница се предвидени безобразни 24 милиони евра по километар пруга. Пругата која би била долга 23,4 километри е проектирана од СДСМ и ДУИ да чини цели 560 милиони евра, односно зголемување за 220 милиони евра од претходно испроектираното. Истата поминува низ центарот на Крива Паланка, а за нејзината изградба треба да се срушат стотина куќи и за жал да се раселат исто толку семејства, а завршува со тунел кој што не води никаде.“ – Додаде Здравковски.
Кај најголем дел од инфраструктурните проекти, не само што е одложена изведбата и се зголемени трошоците, туку се создало и опасност тие дополнително да го оптоварат државниот буџет со нови давачки. Од владеачко мнозинство порачаа дека новото ракводство на македонски железници и државни патишта ќе помогнат во расчистување на случајот, а се заложија дека ќе се обидат и да го декласифицираат договорот со „Бехтел и Енка“, за тој да стане достапен до пошироката јавност.
Никола Цветкоски
