Нема милост за никој каде засилените инспекциски контроли детектираат неправилности и пропусти во досегашното работење како во институциите, така и во установите. По завчерашната четири-часовна контрола, Дирекцијата за заштита и спасување со усно соопштение му стави катанец на прилепскиот Народен театар „Војдан Чернодрински“.Таму, при формалниот инспекциски надзор извршен на 24 март, биле констатирани серија фактички недоследности и отстапки од официјално пропишаните елементарни норми и стандарди за безбедно и непречено функционирање на една јавна установа. „Во очекување и на писменото решение, ова подразбира, засега на неодредено време – забрана за користење на објектот како објект за масовни приредби, театараски поставки и други настани и случувања, велат од прилепскиот театар. По добивањето на Решението од Инспекцискиот надзор на ДСЗ, театрот во координација со Министертсвото за култура ќе чека конкретни задолженија колку и дали ќе можат да се отстранат 15-те детектирани неправилности во објектот за тој повторено да биде ставен во функција.
Граѓаните пак, со силна поддршка за засилените инспекциски контроли. Бараат неселективност, континуитет, но и драстично зголемување на казните, бидејќи ова што сега ни се случувало било таложено со децении.
Инаку, јавна тајна е дека прилепскиот театар со години работи во субстандардни услови за што редовно алармираа и актерите. Впрочем, како и сега, кога самите, уште на 17-ти март побарале ДСЗ да изврши вонреден инспекциски надзор за да се констатираат состојбите во 7,5 децении стариот објект на НТ „Војдан Чернодрински“.
