Раздвижувањето во изградбата на со години заглавената патна инфраструктура низ земјава, во последниве месеци позитивно се рефлектира и врз македонската економија. За само една година, низ целата земја изградени се и пуштени во употреба над 70 км експресни патишта и автопат, од кои дури 25,7 км се само во прилепско-кавадаречкиот регион, односно двете делници од Експресниот пат Прилеп – Градско. Според Регионалната стопанска комора од Прилеп, ова е одличен сигнал кој веќе придонесеува за раздвижување и на локалната економија.
„Прилепската економија за нијанса бележи раст. Значи, некој половина до еден процент од БДП го поткренавме во однос на претходните години. Тоа значи дека Прилеп како регион дава се’ поголема тежиба или учество во делот на БДП и за понатаму сметаме дека овие инфраструктурни проекти кои се започнати, што побрзо се завршат, но и оние кои се најавени, од страна не само на Владата, туку и на оние кои во предзиборната кампања ги гледаме и од кандидатите, тогаш сметаме дека Прилеп во наредните 3-4 години би требало и понатаму да бележи раст во делот на учеството во БДП“, – изјави Никола Мариноски, претседател на Регионална стопанска комора – Прилеп.
Пелагонискиот плански регион со години е инфраструктурно „слепо црево“, кој заради лошата патна комуникација губи сериозни домашни и странски инвестиции. На овој проблем, пелагонсиките бизнисмени реагираат подолго и од една деценија, бидејќи како што велат, големи штети им трпат бизнисите.
„Успехот на работењето на една ЛС во денешно време има многу поголемо значење од самата централна власт. Доколку ЛС се фокусира на креирање на едно подобро општество за своите граѓани, тогаш верувам дека и ние како прилепчани сите би си го задржале своето огниште и би го намалиле бројот на одлив на нашите млади сограѓани, како надвор од нашата земја, така и во главниот град на нашата земја“, – вели Ирена Јакимоска, бизнисмен.
Пелагониските бизнисмени очекуваат дека со изградбата на Автопатот Прилеп-Битола, која е во тек, и со модерното поврзување со соседна Грција, овој Регион пак ќе може да се врати на старите златни патеки кога неговото учество во БДП било дури и над 17 проценти.
