Враќање на спортот во со години запуштените, инаку велелепни спортски објекти во Прилеп. Спортската сала „Македонија“, како и Универзалната сала, ќе блеснат во некогашниот сјај, најавува министерот за млади и спорт, Борко Ристовски. А досегашното пролонгирање на нивното реактивирање се должело на објективни, главно технички и безбедносни причини кои биле утврдени во последниве месеци.
„Почната е веќе постапка, процедура за раскинување на договорот со концесионерот за спортската сала ‘Македонија’. Договорот ќе биде раскинат, ќе биде салата преземена од Министерството за спорт, ќе биде реконструирана делумно. Разговараме со една локална компанија која што е заинтересирана да ја стопанисува, да вложи дел во таа сала и да биде предадена да се користи“, – изјави Борко Ристовски, министер за млади и спорт.
Слична е состојбата и со Универзалната сала, за каде исто така има заинтересиран локален концесионер. Но, при последните контроли од страна на градежни инженери, а по налог на Министерството, било утврдено дека постојната градба со дел од трибините навлегува и во ѕидот од објектот, што само по себе е сериозен статички ризик.
„Универзалната сала не е под Министерството за спорт, таа е под ПОИК. Меѓутоа, јас си ја зедов обврската да бидам медијатор во таа ситуација… По посетата со инженерите увидовме дека навистина не е безбедна салата и не постои ни минимум шанса да добиеме дозвола од инженери за да може таа сала да биде пуштена во употреба… Проблем е што делот од конструкцијата на трибината завршува во ѕидот, нешто што пред многу години е направено и тоа е поголемиот дел од опасноста затоа што доколку дојде до некаков инцидент, може да се случи, не дај Боже, целата сала да падне затоа што е во конструкцијата на самиот ѕид“, – појаснува Ристовски.
Напоредно со овие две сали, Министерството ќе работи и на одземање на концесија за спортскиот комплекс „Маркови Кули“, бидејќи постоечкиот повеќедецениски концесионер одамна не ги исполнувал условите за стопанисување со мултинаменскиот објект.
Инаку, Министерството за млади и спорт, на чело со оваа влада, досега има изградено или реконструирано преку 30 помали спортски игралишта во целата земја, и според министерот, тој тренд ќе продолжи и понатаму со уште позасилено темпо на работа.