„Трагедијата во Кочани ја доживувам како лична, Србија секогаш ќе биде тука за Македонија“ изјави Вучиќ.
Претседателот на Србија, Александар Вучиќ, ги посети повредените Македонци кои се на лекување во Србија по трагичниот пожар во дискотеката во Кочани. Вучиќ изрази длабоко сочувство и солидарност, нагласувајќи дека трагедијата ја доживува како своја и како да се случила во Србија.
Тој истакна дека Србија е подготвена да прима уште пациенти, бидејќи располага со врвно опремени болници и нуди најдобри услови за лекување. Вучиќ додаде дека Србија секогаш ќе стои покрај Македонија, како што и Македонија беше тука за Србија во тешки моменти.
„Невозможно е да се најдат подобри услуги во Европа. Никаде во Европа нема интензивна нега со подобри услови од овде во Белград. За нас трагедијата во Кочани е како да се случила каде било кај нас. Верувам дека ќе успееме да им помогнеме на овие луѓе кои дојдоа со многу тешки повреди. Ние сме на располагање на нашите македонски браќа и пријатели, и сме подготвени да примиме уште пациенти“, порача Вучиќ.
