Продолжува посетата на македонската владина делегација, предводена од премиерот – Христијан Мицкоски, на Обединетите Арапски Емирати. Претседателот на македонската влада денеска ја посети Стопанската комора на Шарџа, при што се сретна со нејзиниот претседател и раководството. „Разговорот беше насочен кон создавање мостови на соработка помеѓу нашите економии, размена на добри практики и идентификување на можности за заеднички инвестиции и поддршка на приватниот сектор. Ваквите средби се клучни за зајакнување на билатералните односи и отворање нови перспективи за бизнис заедницата“, напиша Мицкоски на Фејсбук.
Македонската делегација, во чиј состав се и вицепремиерот и министер за транспорт – Александар Николоски, министерот за надворешни работи и надворешна трговија – Тимчо Муцунски, генералниот секретар на владата – Игор Јанушев, и уште неколкумина, вчера беа примени од претседателот на Обединетите Арапски Емирати, шеикот – Мухамед бин Зајед Ал-Нахјан.
Во обраќање од Абу Даби, премиерот Мицкоски порача дека до четврток, до кога ќе престојуваат во Емиратите, очекува многу плодни и успешни средби кои ќе значат зајакнување на економската соработка помеѓу двете држави.
