Трагедија во Охрид. Жена смртно е прегазена на тротоар, откако автомобил излетал од кружен тек и ја удрил. Несреќата се случила околу 22 часот, кога 45-годишна охриѓанка се враќала дома од работа. Таа се движела по тротоарот во близина на поранешниот „Мини маркет“ и гимназијата, заедно со машко лице, кога одеднаш врз нив налетало возило „Фолксваген голф“.
Возачот, според првичните информации, изгубил контрола врз автомобилот и наместо да го следи правецот на кружниот тек, завршил во пешачката зона. Жената била тешко повредена и итно префрлена во болницата „Св. Еразмо“, каде, за жал, им подлегнала на повредите. Од охридската полиција информираат дека увид на местото извршила полициска екипа, а јавен обвинител е веќе вклучен во истрагата.
