Општина Маврово и Ростуше продолжува со континуираните инвестиции во правец на подобрување на локалната патна инфраструктура. Во моментов, активно се спроведува втората фаза од проектот за рехабилитација, санирање и асфалтирање на локалниот пат кој ги поврзува селата Велебрдо и Требиште – информираше Фикрет Ибраими, одговорен во секторот за односи со јавноста во општината.
Со текот на работите денеска попладне се запознаа градоначалникот Онер Јакупоски, заедно со членот на Советот на општината Адмир Арслани.
Искажаа задоволство од динамиката и квалитетот на работите нагласувајќи го значењето на овој проект и посветеноста на локалната самоуправа кон рамномерен развој на сите населени места.
-Наш врвен приоритет останува подобрувањето на условите за живот на сите граѓани, без разлика во кое населено место живеат. Со рехабилитацијата на патот од Велебрдо кон Требиште, решаваме уште еден проблем и докажуваме дека интензивно работиме на подобрување на локалната инфраструктура во секој дел од нашата општина – изјави Јакупоски.
Освен овој, во тек на реализација се уште неколку капитални проекти, меѓу кои изградбата на нов резервоар за вода за пиење во Ростуше и реконструкцијата на спортската сала „Македонија”.
