Катерина Трајкова од Велес и Славица Малинова од Куклиш, струмичко, се прогласени за најдобри жени фармери на петтото издание на манифестацијата „Агро саем Струмица 2025“ што се одржа денеска на плоштадот „Гоце Делчев“ во Струмица на кој беа изложени голем број земјоделски производи и земјоделска механизација. Наградата за најдобар млад фармер им беше доделена на Васил Гавровски од Босилово, Кристина Тодорова од Неготино и Ристе Гоцевски од Моноспитово.
Саемот го организираше здружението „Проагро фармери“ од Струмица и според претседателот Борче Јанев целта на оваа манифестација е поддршка на домашното земјоделско производство, да се подигне свеста за домашно произведената храна и да се купуваат македонски производи.
-Целта на саемот е да го промовираме домашното производство, додека посетителите сакаме да ги поттикнеме да купуваат домашни производи, да ги запознаат домашните производители, локални херои, производители на храна, да ги слушнат нивните приказни, да ги вкусат нивните производи, а нам ни останува да купуваме македонски производи, рече Јанев.
Манифестацијата за отворена ја прогласи заменик градоначалничката на Струмица, Елена Магеровска Паликарово.
-Струмичкиот е еден од најголемите земјоделски региони во Македонија, а со оваа саемска манифестација потврдува дека е и еден од најголемите поддржувачи и поттикнувачи на домашното производство на храна, затоа што нашето поднебје ги има сите услови за производство со врвен квалитет. Да си го цениме и промовираме домашното производство, да ги поддржуваме домашните производители, да го јакнеме економскиот развој од кој бенефит ќе имаме сите ние заедно, истакна Магеровска Паликарова.
На саемот беа прогласени и најдобрите производители на мед од Балканот, а манифестацијата се одржа со финансиски помош од Министерството за земјоделство, шумарство и водостопанство и Општина Струмица.
