Пред споменикот „Македонија“, подигнат во чест на трагично загинатиот македонски претседател Борис Трајковски, родната Струмица одбележа 22 години од неговата смрт.
Членови на семејството Трајковски, пријатели, претставници на локалната самоуправа, политички партии, институции и здруженија на граѓани со положување цвеќе и поклонување пред неговиот споменик ја искажаа својата почит.
За ликот и делото на претседателот Трајковски говореше градоначалникот на Струмица, Петар Јанков.
– Борис Трајковски беше човек со длабока христијанска вера, со изразена лична скромност и човечност. И покрај високата функција што ја извршуваше, остана близок до народот, достапен и искрен. Ние струмичани тоа најдобро го знаеме. Тој ја претставуваше државата со јасна визија за евро-атлантска интеграција со стремеж кон членство во ЕУ и НАТО и со порака дека Македонија припаѓа на семејството демократски и мирољубиви народи – рече Јанков.
Во рамките на одбележувањето на годишнината од смртта на претседателот Трајковски рецитатори од Домот за деца и млади „Благој Мучето“ од Струмица рецитираа пригодна поезија, а Унијата на жените на ОК ВМРО-ДПМНЕ традиционално засади дрвце во паркот во близина на споменикот на Трајковски.
