25 години Карневал „Прочка“, еден век постоење на „Прилепските мечкари“. Карневалски Прилеп, во знакот на овие два значајни јубилеи, но и во пресрет на празникот „Велики поклади“, традиционално ги започна годинашните карневалски денови, а кои ќе финишираат в понеделник. Со отворањето на тематската изложба на преку 500 рачно изработени маски и сурати од страна на прилепските ученици, и со доделување на вредните награди за најуспешните, Прилеп започна да пулсира во својот препознатлив карневалски дух, кој е успешен спој на традицијата и модерното.
„Има навистина многу убави маски и секоја година сѐ се поинтересни, затоа имаме и многу повеќе категории оваа година. Освен традиционални, избравме и најиновативни“ – рече Анита Јовеска, член на жири-комисијата.
„Мојата маска претставува ‘изгорено дрво’ претставено во човек. Пораката на оваа маска е да не биде ниту едно дрво пресечено и да бидат заштитени шумите… Користев природни материјали – дрво, сунѓер и сл.“ – изјави Димитар Седлоски, ученик и добитник на Гран-при наградата.
Карневалот „Прочка 2026“ годинава го враќа и својот меѓународен карактер, така што на главното карневалско дефиле, кое ќе се случи в недела, маскирани гости ќе има и од неколку соседни земји. Тие, со своите маски, ќе дефилираат под стручното око на претседателот на Европската федерација на карневалски градови – ФЕКК, Ларс Алгел од Шведска.
„Очекуваме до в година дека би имале уште повеќе гости, уште повеќе маски од секаде во светот и уште поголема тежина на овој настан, заради годишнините кои што ги славиме – 100 години ‘Прилепски мечкари’ и 25 години Карневал ‘Прочка’ возобновен. Го имаме и претседателот на Европската федерација на карневалски градови, кој што в недела ќе биде присутен на овој карневал. Значи, комплетно го враќаме сјајот на она што значеше Карневал ‘Прочка’ во Прилеп. 2026 година ќе биде забележана во аналите и ќе имаме еден поразличен начин на претставување на овој карневал“ – изјави Дејан Проданоски, градоначалник на Прилеп.
Утре на дефиле ќе се претстават најмладите маскирани учесници, а в недела точно напладне ќе се случи главното дефиле за возрасните и сите ќе бидат оценувани од стручно жири. За време на карневалските денови низ градот ќе дефилираат жонглери, кловнови, ќе настапуваат музички групи, а чаршијата и угостителските објекти ќе имаат и продолжено работно време. Годинава, по 10-годишна пауза, свој промотивен настап ќе има и возобновениот Градски дувачки оркестар.