Подигање на свеста за еко-системот во кој што живееме со организирано чистење на дивите депонии околу излетничките места, но и на улиците кои се на влезовите во градот. Ова е дел од планот на новиот градоначалник Дејан Проданоски, за почист и незагаден Прилеп. Во акцијата, која в сабота ќе се спроведува под мотото “Еко-мисија,твој потпис за природата“, освен надлежните јавни претпријатија, ќе бидат вклучени и компаниите, невладини организации, но и граѓани и ученици.
„Сакаме да ги организираме сите граѓани, сите административци, сите луѓе вработени во реалниот сектор и да дадеме свој приодонес за чистење на она кое што сами го загадуваме, односно го расфрламе отпадот во околината на нашиот град. Предвидени се неколку локации на кои што сметаме дека треба да се посвети внимание“, – изјави Дејан Проданоски, градоначалник на Прилеп.
„Во минатиот период беа засадени негде околу 150 зимзелени дрвца на повеќе локации во градот, Могилата на непобедените, а исто така и во кругот на Капелата на Старите градски гробишта“, – рече Рубин Абрашоски, директор на ЈКП „Комуналец“, Прилеп.
Со акцијата ќе се чисти околу Вештачкото езеро и кај излетничките места „Селце“ и „Волково“, каде пак, планирано е во блиска иднина да „никнат“ и рекреативни паркови. А најмалите прилепчанчиња ќе бидат вклучени во бојадисувањето на дрворедите во градот. Инаку, казните за непочитување на Законот за управување со отпад, се доста високи и изнесуваат од 500 до 1.000 евра за физички лица, и од 9.000-15.000 евра за правните субјекти, во зависност од нивната големина, потсетуваат од општина Прилеп.
