Извонредните и уникатни природни, културни и туристички потенцијали со кои располага Преспанскиот регион станаа дел од двегодишната Програма за одржлив туризам во рамките на Проектот „ЕУ за Преспа“, а реализран од УНДП. По објавата на трите јавни повици, а наменети за различни чинители од областа на туризмот, сега активностите ќе бидат насочени кон обуки и менторство за управување со сместувачки капацитети и развој на одржливи туристички производи и унапредување на односите со клиентите. А ќе има и повик за доделување на грантови на даватели на сместувачки услуги со цел унапредување на нивните капацитети, како и на граѓански организации за развој на одржливи туристички производи, бидејќи развојот на туризмот во Преспа претставува клучен столб на локалната економија, велат од Општина Ресен.
„Како што е уникатна и нашата Преспа со Националните паркови, со убавините, со езерото, така е уникатен и овој проект и се надевам дека ќе биде мотив не само да застенеме тука, туку и да отпочнеме една приказна и да мотивираме многу други“, – изјави Јован Тозиевски, градоначалник на Ресен.
Општинската администрација, во тесна соработка со централните власти и сите заинтересирани страни, посветено работи и на ревитализацијата на регионот, искористувајќи ја уникатната положба меѓу величествените национални паркови „Пелистер“ и „Галичица“. За таа цел, потпишан е и Меморандум за соработка помеѓу УНДП, Општина Ресен и двата Национални парка, за развој на интегрирана туристичка инфраструктура на отворено, којa ќе опфати обележување и уредување на 100 километри велосипедски патеки и 70 километри пешачки патеки, а кои ќе поминуваат низ заштитени подрачја во Преспа.
„Иницијативата што ја потпишуваме денес е прва од таков вид, односно е уникатна и за првпат така обемна, со која ќе се даде поддршка на туризмот и туристичките продукти“ –рече Армен Григоријан, постојан претставник на УНДП.
Инаку, “Проектот „ЕУ за Преспа“ е насочен кон одржливо управување и користење на природните ресурси во Преспанскиот регион, со цел подобрување на квалитетот на живот и економски развој преку нови „зелени“ патишта во земјоделството и туризмот. Во рамките на истиот Проект, во март годинава, започнаа и градежните активности за повторно отворање на Граничниот премин „Маркова Нога“ кој цели шеесет години е затворен. Тој ги поврзува Македонија и Грција и треба да биде ставен во функција кон крајот на идното лето. Неговата вредност е 14 милиони евра.
