Во Општина Берово се одржа инфо-сесија посветена на јавниот повик за граѓанските организации за поднесување предлог-проекти во рамки на Регионалната програма за локална демократија во Западен Балкан 3 (ReLOaD3), финансиски поддржана од Европската Унија.
На присутните им се обрати градоначалникот на Општина Берово, Петар Ружински, кој изрази благодарност до Програмата за развој на Обединетите нации (УНДП) и Европската Унија за континуираната поддршка во унапредувањето и зајакнувањето на граѓанскиот сектор.
Тој посочи дека преку програмата ReLOaD3 се отвораат можности за реализација на квалитетни иницијативи и проекти насочени кон потребите и приоритетите на локалното население.
Во рамки на инфо-сесијата, присутните имаа можност подетално да се запознаат со условите и критериумите на јавниот повик, како и да добијат дополнителни информации и појаснувања за подготовката и поднесувањето на проектните апликации.
-Целта на повикот е да се поттикне подготовката и реализацијата на квалитетни, одржливи и применливи проекти кои преку соработка и партнерство меѓу локалната самоуправа и граѓанските организации ќе придонесат за подобрување на квалитетот на животот и создавање конкретни придобивки за граѓаните на Општина Берово, информираа од Општината.
Програмата ReLOaD3 претставува поддршка за јакнење на партиципативната демократија и граѓанското учество во процесите на локалниот развој.
