Градоначалникот на Струга, Рамиз Мерко, доби ослободителна пресуда во случајот со набавката на луксузниот автомобил „Ауди А6“, вреден 67 илјади евра и уште три други автомобили.
Судот утврдил дека во процесот на јавната набавка немало докази кои укажуваат дека Мерко ја злоупотребил службената положба. Судијата Јордан Јованов во усната објава кажа дека судот не утврдил дека Мерко сторил кривично дело.
Неговиот адвокат, Игор Петковски, вели дека со тоа што судот не утврдил ниту еден доказ, пресудата покажува оти не било сторено никакво кршење на законот при набавката на службените возила чија вкупна вредност изнесува 114 илјади евра.
Од ВМРО-ДПМНЕ велат дека ослободувањето на Мерко е најголем доказ дека со судството и обвинителството раководат СДСМ и ДУИ. Правниот систем е разрушен од судиите и обвинителите кои ги постави СДСМ и ДУИ, а кои имаат единствена цел да го спасат од одговорност секој нивен функционер кој со години ја ограбувал државата, обвинија од владејачката ВМРО-ДПМНЕ.
