Во Струга, од изутрина започна литургијата за Успението на Пресвета Богородица – празник познат и како Голема Богородица. Со овој ден заврши двонеделниот пост, а стотици верници од градот и пошироко се собраа, на молитва под отворено небо на местото во близина на Женска плажа. Тие веќе десетина години мака мачат со општинските власти, затоа што не им е дозволено на ова место да изградат црква.
„Верниците и денеска со молитви се надеваат дека нивната желба ќе стане реалност – конечно по една деценија борба со општината, на ова место зад мене да се изгради црква“.
Местото на кое се одржува литургијата било одземено од државата уште пред педесетина години, за конечно во 2015 да биде вратено во црковна сопственост. Литургијата ја водепе локален свештеник заедно со свештеник од Поградец од Албанија и таа се водеше и на македонски и на албански јазик.
Претходно, на 15 август литургија се одржа во местото Поградец во храмот Пресвета Богородица, па затоа граѓаните бараат да се изгради црква и кај нас.
Отецот вели дека изградбата на православен храм само може да доведе до обединување на Стружани без разлика на нивната етничка припадност.
„Градењето храм за нас не е примарна цел, ние овде си ги остваруваме овде богослужбените потреби на ваков начин, но секако дека е реална потреба, не само за православната заедница туку и општо и за градот ако земеме во предвид дека откако постои Македонија, во некаков државен облик, освен храмот на гробишта, во Струга не е изграден ниту еден друг храм“, изјави отец Александар Димовски.
И граѓаните на ист став. Тие сметаат дека црква на ова место е и повеќе од потребна и се надеваат дека општинските власти конечно ќе се вразумат и ќе ги прифатат нивните барања.
Литургијата за Пресвета Богородица во Струга е повеќе од верски чин, таа стана симбол на упорноста на граѓаните кои не се откажуваат од идејата за изградба на свој храм.
