Американскиот весник „Вашингтон пост“ објави дека Пентагон се подготвува за повеќенеделни копнени операции во Иран. Повикајќи се на официјални претставници, весникот пишува дека секоја потенцијална мисија ќе биде со помал обем од инвазија со полни размери и би можела да вклучува комбинација на специјалци и конвенционални пешадиски трупи. Според анонимен извор, за реализација на целите кои се разгледуваат, веројатно ќе бидат потребни „недели, а не месеци“. Друг, пак, проценил дека потенцијалната временска рамка за некој од видовите на операции е неколку месеци.
Ако американскиот претседател ги одобри плановите, тоа би значело нова фаза на ескалација на војната која би можела да биде значително поопасна за американските сили отколку првите четири недели.
Илјадници американски маринци веќе пристигнаа на Блискиот Исток, но не е познато дали Трамп ќе ги одобри сите, некои или ниту еден од плановите на Пентагон.
