Известувачот на Европскиот парламент, Томас Вајц, откри дека претрпел сериозни притисоци, бил цел на валкана кампања, па дури добивал и закани по животот додека работел на извештајот за напредокот на Македонија.
Во интервју за Канал 5, тој откри дека поради неговата работа бил мета на екстремно десничарски групи на Телеграм, каде што бил споделен неговиот телефонски број. „Добивав закани по живот, а тоа продолжи и по гласањето на извештајот“, рече Вајц. Тој посочи дека целата ситуација дополнително ескалирала и во Бугарија, а потврди и дека бугарски европратеници се обиделе да го отстранат од позицијата известувач.
„Имаше кампања против мене дека сум корумпиран, дека сум пристрасен… Ми замеруваа што сум разговарал со македонски соработници. А јас им велев: ‘Извинете, но ова е извештај на ЕУ за Македонија – со кој друг да разговарам?’“, рече Вајц, коментирајќи ја ситуацијата со доза иронија.
Тој нагласи дека извештајот бил долг и тежок процес, особено затоа што за земјата немало подготвен извештај уште од 2022 година. „За жал, бугарски европратеници се обидоа да го блокираат целиот извештај. Нивната главна цел беше тој воопшто да не се изгласа. Единствената измена што се бараше беше бришење на деловите во кои се признава македонскиот идентитет и јазик“, изјави Вајц.
