На прагот од новата производствена сезона на тутунот, се бележи рекордно зголемување и на склучените договори и на површините. Некои од тутунопроизводителите годинава дури и двојно го зголемуваат своето производство. Тие велат дека во моментов најдоходовна земјоделска гранка е тутунопроизводството, иако нивните очекувања се дека и откупната цена ќе бележи раст и заедно со субвенциите ќе достигне барем до 10 евра за килограм тутун.
„Лани имав 40 декари. Годинава мислиме да имаме повеќе, 80 ќе бидат. Очекуваме да почнеме да садиме околу 7-8 мај, тука некаде, така ни е планот… Догодина можеби ќе ги зголемиме количините пак, како годинава што ги зголемивме… Со цената – добра беше, но сега, бидејќи поскапува нафтава, очекуваме Владата да даде до 500 денари и со субвенции 600 да биде. Најсреќни ќе бидеме ако биде така“, вели Миле Трајкоски, тутунопроизводител од с. Мало Коњари.
И од Сојузот на тутунски здруженија потврдуваат дека годинава се очекува рекордно производство, или во однос на лани за над 10 проценти. Склучени се 35.227 договори за обработка на 15.000 хектари површина, а пресметките велат дека приносот ќе тежи околу 31.575.000 килограми тутун. Во тек е и подготовката на документацијата за исплата на субвенциите на сите тутунари.
„Подобро платена култура од тутунот во моментов немаме. Така што сите земјоделци ги зголемуваат површините врз основа што е зголемена цената за откуп… Во тек е изработката на налозите за исплаќање на субвенциите, значи до крајот на месецов ќе се изработат и ќе се исплати субвенцијата за сите тутунопроизводители“, изјави Кире Ристески, претседател на Сојузот на тутунски здруженија.
Благодарение на Владата и ресорното Министерство за поголема помош на тутунопроизводителите, годинава е намалена и маржата на цените на ѓубривата – за 5 проценти кај вештачките и 10 проценти кај органските ѓубрива. Покрај ова, од Сојузот уверуваат и дека не се откажуваат од преговорите со откупувачите за повисоки откупни цени.
