Сојузот на тутунски здруженија интензивно се организира да му помогне на многучленото семејство Керимоски од прилепското село Канатларци, кое во саботата за неполни два часа, во голем пожар, изгуби речиси се’. Од макотрпно стекната животна печалба, не им остана речиси ништо. Штетата е огромна, преку 100.000 евра. Изгорени се помошни простории, земјоделска механизација, патничко возило, три мотоцикли, но и над 4,5 тони тутун. Со тешката мака на Керимиски, први се солидаризираа тутунарите од Сојузот на тутунски здруженија. Велат, ќе им помогнат и со тутун, и со финасиски средства.
„Навистина е направена огромна штета. Ние како Сојуз веднаш апелиравме тука до месното население да излезе со помош и кој колку може да подари балиња тутун. Меѓутоа, тоа да не биде стихијно, туку да се организира и да знае сето тоа да го направи. Значи, му кажавме на Селим дека не е сам, дека ние како Сојуз стоиме зад него, дека ќе го помогнеме – и финансиски во склад со нашите средства, така што во текот на денешниот и утрешниот ден ние ќе му испратиме некоја помош. Меѓутоа, побаравме и поширока помош, од стопанствениците, а во текот на денов ќе стапам во контакт и со откупувачите на тутун“ – кажа Кире Ристески, претседател на Сојузот на тутунски здруженија.
Ништо од имотот на Керимоски не било осигурано, што дополнително ја усложнува целата оваа тажна ситуација, вели Ристески, и додава дека и тука, како Сојуз, ќе се обидат нешто да помогнат, преку Платежната агенција.
„Заради тоа што механизацијата му е изгорена, а која е се уште под гаранција, односно со овие пет години да не може да се отуѓува механизацијата. Значи, во текот на денешниот ден ќе разговарам и со директорот на Платежната агенција. Тие колку можат да помогнат и да го одложат начинот на исплаќање на таа механизација“, – дополнува Ристески.
Инаку, пожарот во домот на семејството Керимоски, избувнал во саботата околу пладне, кога дома немало никој. Први на помош притекнале соседите, но огнот брзо голтал се’ пред себе, причинувајќи огромна штета. Од овие причини, семејството кое живее исклучиво од земјоделство, вели дека секоја помош им е добредојдена, воедно апелирајќи до сите хумани граѓани да им помогнат час поскоро.