Пред старот на откупната реколта за десетина дена, тутунарите се подготвени да го предадат годинашниот род. Велат, есенските дождови биле добредојдени и за квантитетот, но и за квалитетот на приносите. Очекуваат родот да тежи до 22 милиони килограми високо-квалитетен тутун, а се надеваат и на повисоки откупни цени.
„Имаме капацитет да ги покриеме сите ваги кои годинава изнесуваат 337, што никогаш не била толкава бројката на откупни ваги, така што се очекува тутунот да се купи многу побрзо и со добар квалитет…Со доцните дождови се продолжи вегетацијата на тутунот и негде очекуваме околу 20 милиони килограми тутун да има сигурно“, – вели Кире Ристески, претседател на Сојузот на тутунски здруженија.
Во наредните денови, најдоцна до в петок, во Институтот за тутун треба да се утврдат и мострите, по што веќе на 18-ти месецов откупувачите ќе можат да го започнат и откупот. Според Ристески, очекувањата на откупувачите дека годинава родот ќе тежи околу 26 милиони килограми, се нереални, а допрва престојат и преговорите за утврдување на откупните цени.
„Можам да тврдам дека тутунот ќе биде подобро платен отколку ланската година…Се донесе и Законот за забрана за увоз. Значи, од почетокот до завршувањето на нашиот откуп е забарането увезувањето на ароматичен тутун. Тоа е се’ во интерес на нашето производство – да си го заштитиме производството, да си го заштитиме нашиот производител“, – дециден е Ристески.
Непосредните тутунопроизводители пак, охрабрени од есенските дождови кои придонесоа за зголемени и поквалитетни приноси, со право очекуваат и повисоки откупни цени.
„Не очекувавме дека ќе имаме зголемување на производството. Но, со есенските врнежи , мислам дека зголемивме околу 10-15 посто…
Некаде на почетокот мислев дека ќе имам до кај 3 тона тутун, но со ова зголемување, некаде 3,5 тони веројатно ќе имам, и очекуваме повисока цена од ланската, бидејќи квалитетот е далеку подобар од ланската година и очекуваме многу повисока цена“, – кажа Ибраим Јусуфи, тутунопроизводител од с. Житоше-долненско.
Инаку, лани просечната откупна цена на тутунот, заедно со субвенциите од 100 ден по кг тутун, достигна до историски 500 денари за кило тутун.
