Тромаво обвинителство коешто не само што не постапува по допрен глас, туку и ги игнорира и пријавите на Антикорупциска, а и извештаите на Државниот завод за ревизија. Ова е причината зошто граѓаните не им веруваат на гонителите на криминал коишто во борбата со корупцијата последниве години покажаа нула резултати. Вака ги коментира обвинителите и ја оценува нивната работа, претседателот на Транспаренси Интернешнл, Благоја Пандовски.
Им недостасува кадар, но обвинителите се клучот во борбата против корупција, па нивното бавно и тромаво работење ништо не го оправдува, појаснува претседателот на невладината којашто со години мери корупција во земјава.
Инаку во барометарот за корупција за ланската година на Транспаренси Интернешнл како активни институции коишто придонеле во борбата за корупција ги посочува Антикорупциска и Државниот завод за ревизија.
Ревизорите редовно објавуваат извештаи и посочуваат недостатоци. Антикорупционерите формирале 65 предмети за изборни регуларности, а најголемо внимание предизвика постапката на Академијата за судии и обвинители и Управниот суд околу избраните кандидати за време на избори.
Во барометарот не изостанува ниту случајот со подмитливиот судија Наќе Георгиев и членот на Советот на јавни обвинители Иџет Мемети кои се спогодија со обвинителството за примањето поткуп. Тука е и црната листа на САД.
На оваа листа се најдоа и поранешни високи функционери, но и луѓе кои директно ја спроведуваат правдата и се дел од правосудниот систем. Ова е еден од индикаторите зошто и така ниската доверба во правосудството во континуитет бележи пад, стои во Барометар на корупција за 2024-та.
Според Транспаренси, ова е еден од индикаторите зошто и така ниската доверба во правосудството во континуитет бележи пад. Обвинителството тромаво постапува и по пријавите на МВР. Барем досега за големи полициски акции и претреси за сомнежи ан голема корупција, обвиниетлството се уште тера предистраги.
Засега Обвинителство отвори само предистрага за високиот функционер на ДУИ, Артан Груби и судијата Енвер Беџети кој чувал предмети во фиока и за кои Стејтдепартментот се сомнева дека земал мито. И покрај сите информации за висока корупција, според последната изјава на државниот обвинител Љупчо Коцевски, допрва ќе се истражува дали постои кривично дело во случајот со Груби и судијата и од нивната одлука ќе зависи дали ќе има истрага и кривична постапка против нив.
