Најмалку девет луѓе, меѓу кои и тројца полицајци, се убиени во рација против „Исламска држава“ во Турција. Акцијата била спроведена во западниот турски град Јалова, каде дошло до престрелка меѓу осомничени членови на терористичката организација.
Осомничените терористи отвориле оган кога безбедносните сили ја нападнале куќата во која се криеле. Турската новинска агенција „Анадолу“ јави дека на помош биле повикани специјални единици од соседната провинција Бурса.
Дел од медиумите јавуваат дека престрелката се проширила и на околните улици. Властите затвориле пет училишта и го прекинале снабдувањето со струја и гас, а на цивили и возила им било забрането да влезат во квартот.
Минатата недела полицијата уапсила 115 осомничени членови на ИД, кои наводно планирале напади за време на божиќните и новогодишните прослави. Според официјални информации, групата повикувала на напади за време на празничните денови.
