Американскиот претседател Доналд Трамп утре во Флорида ќе се сретне со украинскиот претседател Володимир Зеленски, соопшти Белата куќа. Билатералната средба е закажана за 15 часот по локално време, во Палм Бич.
Се очекува Зеленски на состанокот да го претстави новиот мировен план од 20 точки за завршување на војната во Украина. Според најавите, планот вклучува предлог за воспоставување демилитаризирана зона, а фокусот на разговорите ќе биде ставен на безбедносните гаранции за Украина.
Во пресрет на средбата, американскиот претседател Доналд Трамп во изјава за „Политико“ нагласи дека нема да даде поддршка пред детално да го разгледа предложениот план.
„Зеленски нема ништо додека јас тоа не го одобрам. Па, ќе видиме што има“, изјави Трамп.
