Американскиот претседател Доналд Трамп и украинскиот претседател Володимир Зеленски зборуваа позитивно за нивните разговори на средбата во Флорида. „Остварен е голем напредок, многу сме поблиску до руско-украински договор“, рече Трамп, додавајќи дека сè уште има едно или две тешки прашања.
Тој посочи дека наредните недели ќе покажат дали може да се постигне решение за прекин на војната во Украина. Зеленски изјави дека имал одлична дискусија со Трамп, но двајцата не изнесоа конкретни детали за напредокот, особено околу евентуалните територијални отстапки.
Зеленски рече дека договориле 90 проценти од мировен план од 20 точки, додека Трамп изјави дека безбедносните гаранции за Украина се договорени 95 проценти. Украинските и американските преговарачи повторно ќе се сретнат следната недела, со цел да се стави крај на речиси четиригодишната војна.
Предлогот за претворање на регионот Донбас во демилитаризирана зона засега останува нерешен, додаде Трамп. Тој откри и дека кратко пред средбата со Зеленски разговарал телефонски со рускиот претседател Владимир Путин, оценувајќи го разговорот како „добар и многу продуктивен“, без дополнителни детали.
