Американскиот претседател Доналд Трамп изјави дека Соединетите Американски Држави мора да го „поседуваат“ Гренланд, и дека тоа ќе го сторат „на лесен или на тежок начин“.
Според него, Гренланд мора да биде американски за да се спречи Русија и Кина да го преземат островот.
Според наративот на Белата куќа, САД се подготвени да го откупат Гренланд од жителите на автономната данска покраина. И Данска и Гренланд цврсто ја отфрлија понудата на Трамп, наведувајќи дека територијата не е на продажба.
Копенхаген предупреди дека секоја воена акција против членка на НАТО би значела крај на трансатлантската одбранбена алијанса.
„Не сакаме да бидеме Американци, не сакаме да бидеме Данци – сакаме да бидеме Гренланѓани“, се наведува во заедничката изјава што ја потпишаа пет политички партии застапени во гренландскиот парламент Инацисартут.
Партиите ги повикаа Соединетите Американски Држави да престанат со, како што наведуваат, „покажувањето непочит кон Гренланд“ и нагласија дека единствено гренландскиот народ има право да одлучува за иднината на островот.
