Трамп: Мерц не знае за што зборува

Американскиот претседател Доналд Трамп ја отфрли критиката на германскиот канцелар Фридрих Мерц за војната во Иран и жестоко го нападна. „Тој не знае за што зборува“, напиша Трамп на својата платформа „Трут Сошл“, осврнувајќи се на Мерц. Не е никакво чудо, додава тој, што на Германија ѝ оди толку лошо – и економски и во други аспекти. Трамп му забележува на германскиот канцелар дека бил согласен Иран да поседува нуклеарно оружје. Според американскиот претседател, доколку Иран има нуклеарна бомба, целиот свет би бил под власт на таа земја. „Во моментов правам нешто во врска со Иран што други нации или претседатели одамна требало да го направат“, вели Трамп. Зошто американскиот претседател тврди дека канцеларот се изјаснил во прилог на тоа Иран да поседува нуклеарно оружје – не е јасно. Не е познато дека Мерц некогаш дал таква изјава.