Американскиот претседател Доналд Трамп ѝ даде рок на ЕУ до 4 јули да го исполни трговскиот договор, во спротивно САД ќе воведат повисоки царини. Трамп изјави дека имал „одличен разговор“ со претседателката на Европската комисија, Урсула Фон дер Лајен, во кој ѝ го пренел својот став за овој рок.
Во објава на неговата социјална мрежа тој наведе дека „трпеливо чекал“ ЕУ да го исполни својот дел од „историскиот трговски договор“ постигнат во Шкотска, кој го нарече „најголем трговски договор во историјата“. Според него, ЕУ се обврзала да ги намали царините на нула, но тоа сè уште не е целосно спроведено.
Тој исто така предупреди дека САД би можеле да ги зголемат царините за автомобили и камиони од ЕУ на 25 отсто, од сегашните 15 отсто, доколку договорот не се исполни.
Трамп додаде дека во разговорот со Фон дер Лајен станало збор и за Иран, при што, како што наведе, се согласиле дека Техеран „никогаш не смее да поседува нуклеарно оружје“.
