За Македонците во Македонија е значајно што со новата територијална поделба на општините не се крати општина Пустец, истакна денеска Едмонд Темелко,поранешен градоначалник на Пустец и граѓански активист, на традиционалното одбележување на Денот на независноста во Штип, а иницирано од Здружението на Македонците од Егејскиот дел на Македонија „Мирка Гинова“ од Штип.
– Од 61 општина што беа до моментот, од мнозинството, од социјалистичката владејачка партија има предлог што е во собраниска процедура, каде ќе има 46 општини. Петнаесет општини се скратуваат во Република Албанија, но тоа што е најважно и најбитно за нас Македонците, општина Пустец останува во предлогот и на владејачката партија и на опозицијата. Значи, Општина Пустец не се ризикува да остане како што беше македонска општина во Албанија-вели Темелко.
Тој додаде дека не е прифатено барањето на Македонците во Албанија да имаат посебни општина во Голо Брдо, Булчица и во областите Гора и Кукаш.
-Добро што општина Пустец останува како македонска посебна општина и ние ќе продолжиме и понатаму да бараме признавање на сите Македонци во целата територија на Албанија – и во областа Голо Брдо и во Гора, за да можат да ги имаат истите права што ги имаат Македонците во Пустец, да имаат и Македонците во Голо Брдо и во Гора-рече Темелко.
Прашан дали во Албанија се почитуваат македонскиот јазик, култура и традиција, Темелко одговори дека во Пустец и насекаде во Албанија, македонскиот јазик, култура и традиција се опстанати, бидејќи се пренесува од дедовци на внуци, од мајки на синови.
– Се пренесува културата и традицијата. Во Пустец е поизразена и повеќе зачувана заради тоа што секогаш во Општина Пустец Македонците се признаени од властите во Република Албанија. Сите знаат, освен да зборуваат, и да пишуваат на кириличко писмо. За разлика од тоа, Македонците што живеат во другите места – во градовите Корча, Билишта, Подградец, во Елбасан, а во областа Голо Брдо каде се мнозинство Македонци, во Гора – таму јазикот и традициите се чуваат само пренесени од нивните предци, без да имаат право да учат во школите на својот мајчин јазик-изјави Темелко.
Тој истакна и дека Албанија има донесено закон на сите малцинства да им се почитуваат правата.
-Се надеваме во иднина и таму да почне да се учи кирилското писмо и македонскиот јазик во училиштата каде што има значителен број на деца Македонци-подвлече Темелко од Штип.
