Под мотото „Светот е поубав кога сме сите заедно“, во ООУ „Св. Јоаким Крчовски“ во Крива Паланка вчера беше одбележан 2 Април – Светскиот ден на аутизмот.
Учениците и наставниците преку низа креативни активности испратија силна порака за прифаќање и поддршка. Училиштето беше обоено во сино – симболичната боја на аутизмот, а преку активноста „Сино срце за секого“ учениците изработија цртежи и симболи инспирирани од виножитото и знакот на бесконечност.
Во училишната сала, најмладите ученици со сини балони ја формираа буквата „А“, симболизирајќи единство и солидарност со лицата со аутизам.
Од училиштето истакнуваат дека преку ваквите активности се поттикнуваат емпатијата, разбирањето и прифаќањето, нагласувајќи дека нивната мисија е да создадат инклузивна средина каде секое дете ќе се чувствува сакано, прифатено и разбрано.
