Црн биланс на македонските патишта. Три животи згаснаа, а 12 луѓе завршија со тешки и сериозни повреди во три одделни сообраќајни несреќи. На автопатот Куманово – Скопје, во близина на Агино Село, се случила сообраќајна незгода во која животот го загубиле две лица, додека три се повредени. Во несреќата директно учествувале две патнички возила – „Мерцедес“ со скопски ознаки, управуван од 65-годишен маж, и „Опел Корса“, исто така со скопски таблички, управувана од 27-годишно лице. Од здобиените повреди веднаш починале двајца сопатници од „Опелот“, а другите тројца во возилото се пренесени на Клиничкиот центар во Скопје, со тешки и полесни повреди. Полицијата го привела возачот на „Мерцедесот“.
Животот го загубила и 17-годишна девојка во тешка сообраќајна незгода на автопатот Битола – Прилеп, во близина на местото „Туланата“. Според информациите, во несреќата учествувале „Опел“ и „Форд“ со битолски регистарски ознаки. Сопатничката во „Опелот“ починала на местото на несреќата.
Тешко повредени се возачот на „Опелот“, 44-годишна жена и 7-годишно дете од Долно Српци, кои биле во „Фордот“. Повреден е и возачот на „Фордот“. Сите биле пренесени во Клиничката болница во Битола.
„На 19.09.2026 во 18:29 часот во СВР Битола е пријавено дека на патот Битола – Прилеп, кај место викано „Туланата“, се случила сообраќајна несреќа помеѓу патничко возило „Опел“ со битолски регистарски ознаки, управувано од Е.Ф. (28) од с. Канатларци, прилепско, и патничко возило „Форд“ со битолски регистарски ознаки, управувано од М.Н. (48) од с. Долно Српци, општина Могила. На местото на настанот починала 17-годишна сопатничка од возилото „Опел“, а смртта ја констатирал доктор од Итна медицинска помош Битола. Возачот на возилото „Опел“, Е.Ф., како и 44-годишната Д.Н. и 7-годишно дете од с. Долно Српци, сопатници во возилото „Форд“, се здобиле со тешки телесни повреди, констатирани во Клиничката болница Битола, а со повреди се здобил и возачот М.Н. Увидот го извршила увидната екипа на СВР Битола“, велат од МВР.
Тешка сообраќајна несреќа се случила и на магистралниот пат Охрид – Ресен, во близина на селото Опеница, во која беа повредени пет лица. Сударот се случил помеѓу „Сузуки Витара“, со скопски таблички, управувано од 67-годишен државјанин на Велика Британија, и „Опел“ со битолски ознаки, управуван од 28-годишен возач од селото Буково. Во Болницата во Охрид и во Специјализираната болница „Св. Еразмо“, лекарска помош била укажана на пет лица кои се здобиле со тешки повреди.
