Во Тирана свечено беше одбележан јубилејот, 15 години од излегувањето на првиот број на македонскиот весник „Илинден“, кој на први март 2011 година како двоброј (март/април) беше отпечатен за првпат.
Во обраќањето пред присутните, Никола Ѓурѓај, главен и одговорен уредник, меѓу другото, рече дека досега се испечатени 71 изданија и оти весникот предизвикал голем интерес кај „македонската читателска публика во Република Албанија, во татковината Македонија, како и меѓу македонската дијаспора во светот“.
– Почнувајќи од март 2017 година, покрај печатената верзија весникот може да се следи и преку своето интернет-издание: www.vesnik-ilinden.com. На тој начин нашиот весник стана достапен за целокупната јавност, како за сите Македонци во Република Албанија, регионот и цел свет. Исто така, од септември 2017 година, македонскиот весник “Илинден“ е стандардизиран според меѓународните норми за печатени и електронски периодични списанија со ISSN и дел од најголеми читачи на вести во Македонија: time.mk, grid.mk и vesti.mk, рече Ѓурѓај.
Весникот, додаде тој, дава голем придонес во евидентирањето и надминувањето на голем број прашања од интерес на Македонците во Република Албанија и континуирано работи на заштита и афирмација на македонскиот етнички, јазичен и културен идентитет и националните традиции на Македонците во Република Албанија.
– Мисијата на нашиот весник беше и останува да го поттикнува и одржува во континуитет македонскиот јазик и идентитет во Република Албанија. Остануваме со вербата дека нашите активности ќе бидат соодветно поддржани од државните институции на Република Албанија и Македонија, како и од Македонците ширум светот, порача Ѓурѓај.
Според него, сите изданија на весникот cе достапни за сите заинтересирани, во Националната библиотека во Тирана, Библиотеката на Собранието на Република Албанија, Националната и универзитетска библиотека „Св. Климент Охридски“ во Скопјe, Библиотеката на Институтот за старословенска култура – Прилеп, Библиотеката на МАНУ, Библиотеката „Григор Прличев“ – Охрид и Државниот архив на Македонија.
Ѓурѓај од име на редакцијата и истоименото друштво, чие гласило е весникот, им се зблагодари на сите свои соработници и сите што го помагат весникот, на Трајче Трајковски од Перт Австралија кој помогнал за свеченото одбележување на јублејот, и секако на многубројната читатлеска публка.
Свеченоста се одржа во хотел и ресторан „Дрери“ во Тирана, на кој присуствуваше и Радмила Стојмировска, вршителка на должност македонски амбасадор, Атанас Плоча, заменик градоначалник на Општина Пустец, Васил Стерјовски, претседател на Македонска Алијанса за европска интеграција, Верица Мукоска, лекторка по македонски јазик на Факултетот за странски јазици при Универзитетот во Тирана, Никола Ангеловски, потпретседател Здружение „ВАРДАР-МКД“-Подгорица, претставници на мисијата на ОБСЕ во Тирана и на здрженија на малцинствата, како и Македонци од Тирана, Корча, Голо Брдо, Преспа, Гора и други гости.
