На магистралниот пат Кичево – Охрид, во близина на планинскиот превој „Пресека“, вчера попладне се случила сериозна сообраќајна несреќа во која учествувале две патнички возила – „Киа“ со скопски таблички, управувана од 53-годишен француски државјанин, и „Шкода“ со кумановски регистарски ознаки, управувана од 42-годишен возач од Куманово.
Според информациите од СВР Охрид, во сударот тешко се повредиле возачот на „Киа“ и неговата 19-годишна сопатничка, исто така од Франција. Телесни повреди здобиле и возачот на „Шкода“, како и тројца сопатници – 36-годишна жена и две малолетни лица, сите од Куманово. Повредените се пренесени и згрижени во охридската болница „Св. Еразмо“.
На самото место увид извршила екипа на ОВР Кичево, а околностите за несреќата се предмет на натамошна истрага.
