Уште едно успешно издание на Македонскиот театарски фестивал „Војдан Чернодрински“. Шеесеттото издание годинава понуди богата содржина со бројни претстави, промоции и изложби. Наградата за уметничко остварување на претстава во целина оди во рацете на ансамблот на Македонскиот народен театар за претставата „Страв и надеж“.
„Јас, како традиционалист или конзервативец, можам да кажам дека со некои претстави можеби не се согласувам, но имам око и уво да видам што е тоа што ме допира или ја допира публиката и едноставно за тоа се определуваш и го одделуваш од другите“, рече Снежана Коневска-Руси, претседателка на жири-комисијата на МТФ.
Она што годинава падна во очи при соопштувањето на наградите беше и недоделувањето на дури четири, инаку со години традиционални награди. Ги немаше наградите за рекламен материјал, за кореографија и сценски движења, за современа сценска драматизација и адаптација, па дури и наградата за современ драмски текст. Според жирито, но и според уметничката директорка на Фестивалот, ова е сигнал дека во македонскиот театар нешто значајно треба да почне да се менува, особено во корист на домашните театарски уметници.
„Мене ми е за тоа многу жал и мислам дека смислата на Фестивалот е да прави промоција на македонската драма, јазикот, културата и традицијата и можеби, ако смеам нешто да сугерирам, во репертоарите на театрите би требало да се размисли да бидат застапени многу повеќе младите современи македонски писатели“, изјави Дарко Лукиќ, член на жири-комисијата од Хрватска.
„Сметам дека треба да бидеме похрабри во духот на ова што е овде напишано и да им даваме простор на луѓето што пишуваат. Јас сум една од тие луѓе што пишуваат. Драмскиот текст не е секогаш завршена верзија… Ајде директорите на театрите, продуцентите и режисерите да бидат похрабри и да поставуваат драми, македонски драми да поставуваат. Ги имаме“, посочи проф. д-р Ана Стојаноска, уметнички директор на МТФ.
МТФ „Војдан Чернодрински“ завршува вечерва со официјалното доделување на наградите и со претставата на белградското Драмско позориште „Црно злато“, која е праизведба на последната драма на нашиот Дејан Дуковски.
