Пробиена банкина, пеплосан автомобил, остатоци од изгорен камион, но и многу отворени прашања. Ова е сликата од скопската обиколница која сведочи за тешката сообраќајна несреќа во која загинаа четири лица. Животот го загубија баритонот и првенец на македонската опера и балет, Ристе Велков, неговиот 20 годишен син и уште двајца негови другари на иста возраст.
-Од здобиените повреди на местото на несреќата починал возачот Р.В. и сопатниците од неговото возило, А.В.(20) и П.М.(20) од Скопје и уште едно лице чиј идентитет засега е непознат. Лекар од Итна медицинска помош констатирал смрт, а по наредба на јавен обвинител телата на починатите се дадени на обдукција. Исто така, по наредба на јавен обвинител возачот Б.Б. е лишен од слобода и задржан во полициска станица, изјави портпаролот на МВР, Гоце Андреевски.
По налог на Обвинителството уапсен и задржан во полициска станица е 76 годишниот возач на камионот марка „Ман“, кој ја пробил металната ограда и излетал во спротивната лента и предизвика сообраќајка која однесе четири животи.
-Б.Б.(76) од Косово, управувајќи товарно возило – влекач „ман“ со полуприколка со косовски национални ознаки, изгубил контрола над возилото и со него преминал преку металната ограда во спротивната насока на автопатот при што се судрил со патничко возило „бмв“ со скопски регистарски ознаки, управувано од Р.В.(51) од Скопје, изјави Андреевски.
Ристе Велков беше еден од најпрепознатливите оперски баритони во земјава. Роден во 1975 година во Скопје, како солист-првенец на национална опера и балет остави длабока трага на македонската оперска сцена. Во текот на кариерата реализираше 26 улоги, а публиката особено го памети по настапите во оперите „Набуко“, „Риголето“, „Магбет“ и Травијата.
Матеја Петровски
