Над 10 милиони денари државата вложува во археолошкиот локалитет Стоби, еден од најзначајните симболи на културното наследство во земјава. Министерот за култура и туризам, Зоран Љутков, најави нови инвестиции и проекти и унапредување на туризмот.
Додава дека поддршката за Стоби е континуирана за заштита, конзервација и презентација на овој уникатен археолошки комплекс.
„Стоби не е само археолошки локалитет, тој е и стратешка точка за развој на македонскиот туризам и, се разбира, најмногу за транзитниот туризам. Неговата близина со автопатот Е-75 го прави идеална дестинација за илјадници патници“, изјави Зоран Љутков, министер за култура и туризам.
Меѓу клучните проекти е адаптацијата на старата железничка станица кај Стоби во современ центар, кој се очекува да биде отворен во септември, а треба да понуди современо искуство за туристите. Близината на автопатот го прави овој локалитет идеална транзитна дестинација за илјадници туристи.
„Сакаме да ја зголемиме видливоста на Стоби, да привлечеме уште повеќе донации“, изјава д-р Силвана Блажевска, археолог.
Знаеме дека на Стоби му е потребна многу конзервација и свесни сме за потребите на овој локалитет. Значи, последиците од атмосферските влијанија се видливи, знаат да се оштетат објектите и тука сме да помогнеме за тоа“, изјави Вил Рејнолдс, претставник на Џ. М. Каплан фонд.
Министерот Љутков вели дека Стоби е препознаен и од меѓународни организации и фондови од САД, Италија и Бугарија. Со новите инвестиции и зголемениот интерес, Стоби сè повеќе се позиционира како важна точка на културната и туристичката мапа, а неговата вредност ги надминува границите на нашата држава.
