Лидерот на единствената македонска партија во Албанија, Македонска алијанса за европска интеграција (МАЕИ), Васил Стерјовски попладнево остварил средба со Нико Пелеши, претседател на албанскиот Парламент.
-На мое големо задоволство и чест имав срдечна средба со Нико Пелеши, претседател на албанското Собрание и голем пријател на македонската заедница во Албанија, информираше Стерјовски.
Разговорот бил фокусиран на важноста од понатамошно подобрување на условите за Македонците, како и на можностите за нивна поголема интеграција во општествениот и политичкиот живот во Албанија.
– Со неговата поддршка, верувам дека можеме да постигнеме значајни чекори напред во зајакнувањето на македонската заедница во Албанија, нагласува Стерјовски.
Нико Пелеши, кој е родум од Корча за пратеник беше реизбран во оваа изборна единица, во која припаѓа и Општина Пустец.
Редовно ја посетува Општина Пустец, порачувајќи дека „без разлика на некои странски влијанија, во Преспа живеат Македонци“.
-Во Преспа живеат Македонци, со македонски јазик, идентитет, култура, традиции. Без разлика на некои странски влијанија за нас тука живеат Македонци. Тие се една прекрасна, вредна и почитувана заедница, што е додадена вредност во мозаикот на културните, историските, етнографските и јазичните вредности на нашите простори, оценува Пелеши.
