Проектот за изградба на браната „Калуѓерица“ во Поречието со водостопанска дозвола уште од 1948 година, исцртана и во Просторниот план на Македонија од 1974 година, а која никогаш не е изградена, тотално го кочи на развојот во овој регион, тврди градоначалникот на Македонски Брод. Според него, овој проект, заради големата застареност, но и заради веќе докажаната неодржливост, итно треба да се избрише од Просторниот план за да може општината да си ги преземе ингеренциите и да обезбеди непречен развој на целата територија.
„Што направивме ние? Ланската година веќе се отвори Просторниот план на Република Македонија, и општина Македонски Брод, како засегната, поднесе иницијатива до Агенцијата за Просторно планирање за да може оваа брана целосно да се избрише од Просторниот план. Таа иницијатива сега е проследена до сите релевантни институции и одделни министерства од каде што треба да се добие мислење. Се надеваме дека во блиска иднина браната „Калуѓерица“ нема да претставува проблем за развојот на Македонски Брод“, – изјави Жарко Ристески, градоначалник на Македонски Брод.
И поречани се убедени дека оваа брана не само што не е потребна, туку никогаш нема да биде ни изградена, бидејќи тоа би значело и потопување на голем број населени места, патишта, но и на веќе развиени, а и потенцијални бизниси кои се лоцирани долж течението на реката Треска.
„Затоа можеби и имаме мал број на сместувачки капацитети, затоа што ние како општина не можеме ништо да урбанизираме во голем дел од течението на реката Треска“, – објаснува Ристески.
Освен ова, голем проблем во оваа, инаку исклучително богата општина со ретки природни ресурси за сестран развој, е и неизградениот пат кон Скопје преку Резерватот „Јасен“ по кој веќе со децении се патува со постојан сообраќаен режим од четири термини дневно.„Благодарение на Националниот парк „Јасен“ ние сме затворени и наместо да патуваме 80 или 90 км до Скопје, ние сега многу често мораме да патуваме двојно повеќе“, – потенцира градоначалникот Ристески.
