Околу 60 проценти од здравствените установи во државава веќе се дигитализирани. Засега, од овој процес, од објективни причини, иземени се само помалите установи главно во источниот дел од земјава. Но, намерата на ресорното Министерство и на Фондот за здравствено осигурување е со дигитализацијата да бидат опфатени сите здравствени установи, на што веќе и интезивно се работи, обелодени денеска од Прилеп, директорот на Фондот за здравствено осигурување.
„Значи, не е сегде иста состојбата. Имаме многу општини каде што здравствените услуги не ги даваат општи болници, туку ги даваат здравствени домови. Таму, најчесто се аналогни се’ уште, значи зборувам за помалите општини на истокот. Веќе е завршена дигитализацијата на општата болница во Кичево, а набргу ќе бидат и другите општи болници и здравствени домови каде што не е спроведен процесот на дигитализација и за рентгените, и за мамографите“, – изјави Сашо Клековски, директор на Фондот за здравствено осигурување.
Општата болница во Прилеп е првата каде што денеска официјално беа предадени во употреба два современи кабинети со дигитална апаратура за Рентген одделението и за Педијатрија. Рентгернскиот дигитален систем со безжичен пренослив детектор и маса за пациентите прилагодлива според висината е во вредност од блузу 9,5 милиони денари, сопствени средства на болницата. А додека ЕЕГ- апаратот за педијатриските пациенти, е донација во вредност од 28.000 евра и е прв таков апарат надвор од Педијатриската клиника во Скопје.
„Денес ми е драго што ја направивме последната аналогна снимка во Рентгерн одделот во Прилеп, и на тој начин ја затворивме таа стара аналогна ера и влеговме во дигитално време…Оваа набавка на овој рентген апарат во поновата историја на Општа болница Прилеп од независноста до денес, во поединечни средства е најголемата и најскапата јавна набавка на медицинска опрема“ – рече д-р Оливер Димитриоски, началник на Оддел за Рентген-дијаностика.
„Со овој Кабинет и со кадарот кој што ќе работи во него, нашето Одделение се поставува како лидер во невро-педијатриската грижа во регионот…Кабинетот е наменет за видео ЕЕГ, метода која што е златен стандард во современата детска неврологија“, – кажа д-р Габриела Тавчиоска, педијатриски невролог.
Според директорот на Болницата д-р Кире Јоноски, набавката на нови апарати, но и на стручен кадар, ќе продолжи и понатаму, особено што Болницата и финансиски веќе е консолидирана.
