Македонија поседува бројни поволни предуслови за развој на женското претприемништво, а чие јакнење може значително да продонесе за севкупниот развој на националната економија, особено преку „оживувањето“ на заборавените локални занаети и на женските вештини за: шиење, креирање, везење, плетење и сл. Ова е ставот на словенечкиот амбасадор во земјава, чија Амбасада и Министерството за надворешни и европски работи на Словенија веќе три години го поддржуваат проектот „Зајакнување на женското претприемништво преку занаетчиство и одржливост“, а имплементиран од Здружението „Добредојде Македонија Welkome Centar“.
„Нашата цел е некако да овозможиме жените од ранливи категории, од различни етнички групи и младите од Македонија да пронаоѓаат нешто ново, нешто убаво, некоја традиција која може беше веќе изгубена – не знаат да прават некои работи како што се: везењето, шиењето, плетењето. Тоа да се вклучи во нивниот живот и тоа да се оствари како некоја можност да се вработуваат и да одат на пазарот на трудот, да се зајакнуваат економски и да прават нешто добро за себе“ – изјави Н.Е. Грегор Прескер, амбасадор на Република Словенија.
За оваа цел, во Прилеп се одржа и Семинар на тема: „Бренд менаџмент и маркетинг стратегија за мали бизниси“, најмногу наменет за учениците од СОУ „Ѓорче Петров“ кои ја изучуваат текстилната струка, но и за младите девојки кои сакаат да се запознаат со современи техники за градење на сопствен бренд, комуникација со клиенти и одржлив маркетинг.
„Мислам дека треба да се направат многу реформи во образованието за да биде поблиско до сегашното време како луѓето – учениците, жените, младите, ќе успеат да направат свој производ…Имаме многу талентирани млади луѓе кои само треба да ги поттикне некој да работат и да научат како да бидат препознатливи на пазарот“ – кажа Емилија Миладинова – Рамчева, претседател на Здружението „Добредојде Македонија Welkome Centar“.
Според словенечкиот амбасадор, во иднина не се исклучува и можноста за уште една соработка меѓу двете земји, а базирана токму на овие наши традиционални вештини и начини на производство во текстилната индустрија. Ова, особено што во Словенија текстилната индустрија не била на некое завидно ниво, а што не е случај пак со Македонија, каде текстилната индустрија се’ уште е една од примарните дејности во повеќе општини.
