Има решенија за хумано намалување на бројот на бездомните кучиња. Подигањето на свеста за одговорност кон животните, особено кон милениците кои често завршуваат на улица поради неодговорни сопственици, е првиот чекор кон намалување на оваа појава. Тука е и едукацијата за потребата од стерилизација и кастрација, но и грижата за севкупното здравје на животните, велат од прилепското Прифатилиште, кое постои веќе седум години во склоп на ЈКП „Комуналец“ и на располагање има само 13 боксови.
„Според процедура, со микрочипирање, вакцинација, кастрација и стерилизација и враќање со ушна маркица на локацијата. Тоа го работиме вкупно седум години и сакаме да испратиме апел до неодговорноста која што се наоѓа меѓу нас, бидејќи не би постоел проблемот ако нема неодговорни сопственици. Ни требаат дополнителни боксови за да можеме да работиме поинтензивно, со побрза динамика, но сето тоа е планирано во нашиот план за 2026 година“, вели д-р Татјана Барлакоска, ветеринарен лекар.
Поради комплексноста на проблемот, кој освен знаење бара и поголеми инвестиции, потребно е поактивно вклучување на сите чинители, вели Барлакоска и додава дека во последно време од голема помош им се професорите и учениците од ветеринарната струка при СОУ „Орде Чопела“.
„Овој проблем е секако настанат од самите луѓе, бидејќи кучињата се зависни од нас, така што ако ние не се грижиме за нивното здравје и, секако, за нивната благосостојба, ќе го имаме овој проблем долгогодишно“, изјави Игор Галески, професор по ветерина во СОУ „Орде Чопела“, Прилеп.
„Во амбулантата се грижиме да бидат вакцинирани, чипирани, а правиме и хируршки зафати како кастрација и стерилизација за да нема размножување на бездомните кученца и да го намалиме проблемот што го имаме. Одиме и во самото Прифатилиште, каде им помагаме на бездомните кученца да бидат нахранети, средени и да имаат добра хигиена“, рече Михаела Силјаноска, ученичка во ветеринарната струка.
Инаку, Општина Прилеп на годишно ниво исплаќа десетици илјади евра на граѓани кои тужеле поради наводни напади од бездомни кучиња. Од ЈКП „Комуналец“ и од Општината се сомневаат дека сите напади биле реални, па бараат промена на методологијата на докажување.
