Општина Битола ќе аплицира со дури 32 проекти на вториот Јавен повик за државна финансиска помош на општините со парите од унгарскиот кредит. Нивната вредност е околу 13,5 милиони евра. Меѓутоа, бидејќи согласно претходно утврдените критериуми за висината на средствата кои може да ги добие секоја општина, Битола има право на само 707 милиони денари, односно на околу 11,5 милиони евра, градоначалникот е оптимист и уверува дека кусокот од близу 2 милиони евра ќе биде обезбеден од општински пари, со единствена цел сите планирани проекти да бидат реализирани.
„Со 32 проекти го очекувавме новиот повик на Владата. Подготвени сме да аплицираме со вкупна сума на сите проекти од околу 707 милиони денари. Тоа е максималниот износ кој би ни следувал како општина, а проектите се во висина од 830 милиони денари и истите планираме да ги дофинансираме. Станува збор за значајни инфраструктурни проекти. Паралелно имаме сработено и друга проектна документација за многу нови проекти, што секако е во контекст на создавањето услови за економски развој на локалната економија и на градот“, вели градоначалникот Тони Коњановски.
И додека се очекуваат парите за новите проекти, во Битола забрзано се работи и на други градежни фронтови. Освен што се интензивираат градежните работи на модерниот влез во Битола од кон Прилеп, во некогашната општина Бистрица започна да се гради современа Спортска сала во руинираната зграда од поранешниот Културен дом, а кој не е во функција уште од далечната 1984 година.
„Бистрица ќе добие нова Спортска сала со корисна површина негде од околу 370 метри квадратни и галерија од 150-тина метри квадратни, со сите придружни елементи кој треба да ги има еден спортски објект…Се работи со средства од буџетот од 37 милиони денари и ќе значи многу, не само за бистричани, туку и за сите овде во регионот“, истакна Тони Коњановски, градоначалник на Битола.
Инаку, на првиот Јавен повик, Битола аплицираше со вкупно 17 проекти. 13 беа за патна и подземна инфраструктура, 3 проекти беа за спортски објекти и еден проект беше наменет за образовен објект.
